mércores, 10 de decembro de 2014

Estamos no tempo...

Estamos chegando ao solsticio de inverno. O Sol está máis preto do horizonte que en ningunha  outra época do ano, ofrecéndonos a menor cantidade de luz. Máis, a partires do día seguinte ao solsticio, os días comezarán a medrar e serán cada vez máis longos.
Dende os tempos máis remotos as diferentes culturas e civilizacións  festexan esta data ao seu xeito, coa mirada posta na chegada da luz do verán.
Os cristianos celebran nesta data o Nadal. Rituais e celebracións do Nadal acompáñanse de cantigas: son as PANXOLIÑAS, CANTOS DE NADAL e CANTOS DE REIS que moitos coñecedes moi ben.
Propoño que as escoitedes, as  disfrutedes e ...as analicedes.
Aquí vos deixo unha mostra:
                                               
                                             CANTIGAS DE NADAL


http://vello.vieiros.com/nadal2001/panxolinhas.html


Tamén podes escoitar  a selección que fixemos o curso pasado buscando no blogue a entrada de decembro do 2013.

                                                 ¡¡¡BOAS FESTAS A TODOS E TODAS!!! 

domingo, 9 de novembro de 2014

IMOS AO CONCERTO

Proximamente alumnos do Castelao asistirán  a un  concerto didáctico.
A Real Filharmonía de Galicia, dirixida por Maximino Zumalave,   ofreceranos  un concerto onde a danza é a escusa para mostrar un magnífico compendio de músicas  de diferentes épocas. 

O programa do concerto fai unha proposta de movementos independentes de suites orquestrais  de Bach, Falla, Ravel e Stravinski facilitando deste xeito a oportunidade de coñecer estilos musicais moi diferentes entre uns e outros autores.

  • A Badinerie é unha danza moi breve e viva. Toma o seu nome do verbo francés badiner (bromear). A Badinerie da Suite nº2 de Bach para frauta e cordas é un dos exemplos máis brillantes de badiner.
       

  • A gavota é unha danza de orixe francés de estilo elegante. Ten un compás de 4/4 ou 2/4 cun tempo moderado ou lento . Fíxose moi popular na corte de Luis XIV de Francia.




  • Le tombeau de Couperin  é unha suite en seis partes do compositor francés Maurice Ravel. Nesta suite fai unha  homenaxe á música francesa do século XVIII. Escoitaremos a terceira e cuarta peza desta suite.





https://www.youtube.com/watch?v=B8xGX06FoUc


  • A Tarantela é una danza  italiana  de orixe napolitano cun ritmo moi vivo.  Ten dúas partes ben  diferenciadas , en compás de 6/8  e vai aumentando progresivamente a velocidade. Escoitaremos a Tarantela do ballet  Pulcinella de Igor Stravinski. 

  •  O amor bruxo é un ballet  para orquestra sinfónica de Manuel de Falla. O argumento narra unha historia de amor e paixón, de bágoas e pesar, de bruxería, morte e danza. Escoitaremos a  Danza do lume e a danza do terror.





mércores, 22 de outubro de 2014

SAMAÍN

A noite do 31 de outubro celebramos o Samaín, unha festa ancestral en honor de Samaín, deus dos mortos. Os celtas crían que nesa data, coa chegada da  noite, o mundo dos mortos facíase máis accesible para os vivos e que os espiritos  regresaban á terra facendo trasnadas ata que saían os primeiros raios do sol, co mencer.
Podes escoitar e cantar algunha das obras e  cantigas que fixemos na aula de música preparando esta data.


https://www.youtube.com/watch?v=CYyRibaMQoA

https://www.youtube.com/watch?v=Z2QAk4sGzuM



https://www.youtube.com/watch?v=PhvpoM4rNoo



luns, 9 de xuño de 2014

MÚSICOS NA AULA: O THEREMIN de Óscar


Hoxe o profe Óscar trouxo á clase de música un Theremin.

O Theremin é un instrumento musical inventado polo físico e violonchelista ruso Leon Theremin en 1919. Foi un dos primeiros instrumentos musicais electrónicos. Ten un  timbre moi peculiar que  semella a algo entre o son  dun violonchelo e a voz humana pero o máis curioso deste instrumento é que o intérprete non ten contacto físico con el en ningún momento.
O diseño deste instrumento  consiste nunha caixa con dúas antenas. A antena dereita é recta e está en posición vertical e serve para controlar o tono. A antena esquerda está en posición horizontal con forma de bucle e controla  a intensidade. Achegando ou separando as mans de cada unha das antenas e sen chegar a tocalas conseguimos sons diferentes: canto máis preto poñamos a man na antena da dereita máis agudo será o son e canto máis nos acheguemos á esquerda máis baixará  a intensidade.
Theremin
O theremin foi empregado por moitos compositores, grupos e intérpretes recoñecidos como Led Zeppelin, Pink Floyd, Estopa, Fangoria...

Grazas Óscar pola túa achega, as explicacións sobre o instrumento e por deixarnos investigar con el.





















Escoita a sintonía de Super Mario Bros interpretada por cun theremin.



O Claro de lúa de  Claude Debussy interpretado cun theremin ten unha cor especial... 





luns, 2 de xuño de 2014

MÚSICOS NA AULA: Sergio e o trombón



O trombón é un instrumento musical aerófono da familia do vento metal. O son prodúcese grazas á vibración dos beizos do  intérprete na boquilla a partires da columna de aire. 
As diferentes notas obtéñense polo movemento dun tubo móbil, chamado vara, alongando a distancia que o aire en vibración debe percorrer, producindo deste xeito sons que tamén se poden controlar cunha maior ou menor presión  do aire soprado polo intérprete na vara: canto máis se alonga  a columna de aire máis grave é o son. 
De igual xeito que case todos os instrumentos da familia do vento metal, o trombón é de latón e consiste nun tubo cilíndrico e aberto enrolado sobre si mesmo. A vara (corrediza) pode ocupar sete posicións diferentes: para cada posición corresponde unha serie de notas.  

O trombón de varas ten tres partes principais: 
Boquilla ou embocadura: peza pequena que se adapta ao tubo do trombón para que o intérprete sopre: os beizos  apóianse nos bordes, vibran e producen o son.
Pavillón: ensanchamento do tubo.
Vara: ten forma de U e móvese en sete diferentes posicións con distinta lonxitude. As varas do trombón non permiten grandes velocidades cando se toca, pero é un instrumento perfecto para interpretar glissandos.


Hoxe Sergio  Manteiga  trouxo o  trombón á clase de música. Presentounos o seu instrumento explicándonos cada unha das partes que o forman e interpretou dúas obras musicais para que escoitáramos o son do trombón en directo.

 Parabéns Sergio, pola interpretación  musical na clase de hoxe e moitas grazas  pola túa achega á clase de música.

 Nos seguintes enlaces podemos escoitar a Segio na audición da aula de música e tamén na que recientemente tivo no Conservatorio de Santiago




domingo, 1 de xuño de 2014

Os nosos músicos: Olga Raíces, soprano.

Recientemente a nosa compañeira Olga ofreceu un concerto na cidade de Granada  formando parte do trío Capriccio vocale, xunto co barítono   Fernando Enseñat e o pianista Julián Jesús Pérez.

 O concerto, cun repertorio  que incluía cancións populares españolas e fragmentos de zarzuelas, emocionou a todo o público asistente. A prensa do día seguinte comentou a "excelente calidade dos artistas e o acerto nas interpretacións baseadas en suaves matices".
 Dende alí nos chegan estas imaxes e as súas marabillosas voces.

 Parabéns Olga, é sempre un pracer escoitarte!



 


luns, 26 de maio de 2014

HUMOR INTELIXENTE E MÚSICA


Joaquín Salvador Lavado Tejón, máis coñecido como QUINO  pensador, humorista gráfico arxentino  acaba de ser recoñecido co Premio Príncipe de Asturias de Comunicación e Humanidades.
Quino é o creador de Mafalda, unha tira de prensa na que a protagonista é unha nena que se amosa preocupada pola humanidade e a paz mundial.  

Mafalda é unha nena idealista e utópica  que reflexiona e critica o mundo no que vive. En moitas das viñetas Quino pon banda sonora aos seus pensamentos: Mafalda ama aos Beatles do mesmo xeito que detesta a sopa. 




Podes atopar outras imaxes de Quino relacionadas coa música no blogue 

venres, 23 de maio de 2014

LETRAS GALEGAS 2014

O segundo ciclo de primaria celebrou o día das Letras Galegas dun xeito moi musical.
O alumnado de 3º C recitounos un contiño moi primaveral sonorizado por eles mesmos cos instrumentos da aula de música.
Rematamos o acto coa cantiga sobre o autor homenaxeado, Díaz Castro, proposta polos alumnos e alumnas do  IES  Díaz Castro de Guitiriz.


ODAIKO no Castelao

Hoxe recibimos a visita no cole de catro excelentes percusionistas, o grupo ODAIKO
A través dos seus instrumentos de percusión relatáronnos unha historia moi divertida e chea de ritmos.



martes, 13 de maio de 2014

OS MAIOS DO CASTELAO

 Os  MAIOS do Castelao


Para facer este maio tivemos que ir roubar
o fiuncho e mais as flores para podelo adornar.

Para facer este maio cociñou a nosa nai
moitos ovos e tortillas para podelo adornar.

Para facer este maio  veu Manolo a cravar
catro paus e unha rede para podelo adornar.

¡Pobres dos xardíns, dos montes e prados
quedaron sen nada por onde pasamos!



LUTHIERS DO CASTELAO 2014

O alumnado de 5º de Educación Primaria converteuse en Luthier  fabricando instrumentos musicais realizados con materiais reciclados.  Na aula de música explicaron como o construíron, os materiais empregados, demostraron como soa a súa creación e ata se atreveron a interpretar  algunha peza instrumental .

  ¡Parabéns a todos os luthiers polo seu traballo e tamén a todas as familias que colaboraron!