Familias de instrumentos

Nos próximos días imos lembrar como se clasifican os instrumentos en familias.
Para comezar  deixo uns  murais, coma os que temos na aula de música, onde vemos os principais instrumentos das orquestras e bandas clasificados en familias.
A continuación déixovos propostas de traballo por niveis para os próximos días.

AERÓFONOS(instrumentos de vento): Son os instrumentos que soan porque vibra unha columna de aire no seu interior producida polo sopro humano ou de xeito mecánico.
VENTO MADEIRA 

  VENTO METAL

                                      

CORDÓFONOS (instrumentos de corda):  Son os instrumentos que soan porque vibran unha ou máis cordas que están tensadas entre dous puntos do instrumento. As cordas vibran cando se pulsan, fretan ou golpean.

CORDA PERCUTIDA

IDIÓFONOS(instrumentos  de percusión madeira e metal):Son os instrumentos que soan porque vibra o material co que están construídos cando os golpeamos, rascamos, fretamos, axitamos, sacudimos...

MEMBRANÓFONOS (instrumentos de percusión pel ou membrana):Son aqueles instrumentos nos que vibra unha membrana tensa cando a golpeamos coas mans, con diferentes baquetas ou con mazos. Algúns, coma a zambomba, vibran cando os frotamos e outros, coma o mirlitón, polo sopro.

ELECTRÓFONOS: Producen ou modifican o son mediante corrente ou circuítos eléctricos.

1º e 2º nivel

Aquí tedes a historia "O pequeno Violín" para que a podades ler en familia.
Ao final da presentación aparecen  unha serie de preguntas e exercicios sobre o tema. Podedes facelos orais, para comentar a historia, ou escribilos en papel. Tamén vos deixo un debuxo do conto para colorear.

O pequeno violín

No blog Caixa de xogos tedes varios xogos on line para repasar os nomes dos instrumentos e a súa clasificación.

 Colorea da mesma cor os instrumentos da mesma familia. Escribe debaixo o seu nome.

3º e 4º nivel

 Podemos clasificar os instrumentos de percusión polo xeito de tocalos:
 

Podemos clasificar tamén os instrumentos de percusión segundo a súa altura sexa ou non determinada. Os instrumentos de altura determinada están afinados e poden tocar melodías. 

Aprende máis sobre os instrumentos nos seguintes enlaces de xogos:
El timbre de los instrumentos
Instrumentos de percusión
O nome dos instrumentos
Clasificamos instrumentos

Investiga e contesta as preguntas:

5º e 6º nivel

Un luthier é un construtor de instrumentos.

A proposta que vos fago a todo o alumnado de 5º e 6º é que vos convertades en luthiers aproveitando estes días de confinamento.

Remexede  polos armarios, alpendres, polo faiado, garaxe, caixóns... na busca de materiais de refugallo cos que construír o voso instrumento.

Pero antes....

1. Revisa con atención os murais que aparecen no comezo desta entrada.

2. Podes repasar a clasificación de instrumentos entrando no blog Caixa de xogos  centrándote na etiqueta correspondente a instrumentos.

3. Revisa as entradas deste blog Suso Gestal...de profesión Luthier e Manel....de profesión Luthier dedicadas a dous luthiers veciños de Ordes que nos visitaron en cursos anteriores.

4. En entradas deste blog, etiquetadas en instrumentos, tedes fotos dos instrumentos construídos polos rapaces e rapazas de cursos anteriores do Castelao.
Tamén nesas entradas tedes enlaces interesantes sobre como construír instrumentos reciclando materiais de refugallo.

Instrumentos na tradición galega 

Instrumentos do mundo

Refugallo sonoro

5. Antes de comezar a facer o instrumento pensa nos materiais e ferramentas que vas precisar para facelo, tendo en conta que non imos mercar nada para construílo. Podes pedir axuda aos maiores da casa se necesitas facer algunha acción que resulte perigosa ou teña moita dificultade.

6. Busca a sonoridade do teu instrumento sen esquecer a estética:é importante que dediques tempo a decoralo e deixalo ben bonito pero o máis importante é que podas facer música con el. 

7. Cando remates o teu traballo como luthier, cubre unha ficha onde deberás indicar o nome do instrumento, a familia á que pertence (aerófono, cordófono, idiófono, membranófono, electrófono), os materiais e ferramentas necesarios para construílo e un debuxo ou esquema do proxecto. 

Debuxo ou esquema do proxecto	Nome do instrumento
	Familia á que pertence
	Materiais necesarios para construílo
	Ferramentas empregadas
Luthier:		Curso:

Se necesitades axuda ou tedes dúbidas contactade comigo      adelacastelao20@gmail.com

Espero poder ver e escoitar moi pronto os vosos traballos. Ánimo!

Chegou a primavera

Chegou a primavera e pillounos a todos confinados nas nosas casas debido ao coronavirus. Se estivésemos na aula de música do Castelao lembraríamos a Vivaldi e escoitaríamos o 1º movemento da súa obra "As catro estacións" .

Antonio Vivaldi naceu en Venecia (Italia) en 1678. Aprendeu a tocar o violín dende moi pequeno da man do seu pai. Con quince anos iniciou estudos para facerse cura mentres seguiu estudando música.  

Ordenouse sacerdote e, debido a unha enfermidade respiratoria que padecía, deixou de facer misa. Conseguiu traballo como profesor de música nun orfanato. Coa orquestra e o coro do Hospicio da Piedade fíxose famoso internacionalmente.  Vivaldi tiña o cabelo de  cor vermella polo que lle puxeron  o alcume o cura vermello.

Escribiu máis de 800 obras e sentou as bases, como compositor, do modelo de concerto italiano en tres movementos, rápido-lento-rápido.

Escoitemos o 1º movemento da suite As catro estacións que nos describe a primavera.

A primavera

Aquí vos deixo outro vídeo co tema do 1º movemento da Primavera de Vivaldi en forma de musicograma: cando se repite un tema musical aparece o mesmo debuxo, máis grande ou máis pequeno segundo a intensidade.

 

Unha cancionciña  para que bailedes un pouco a ritmo de rock.

E podemos cantar a primavera con Mamá Cabra

Unha  fermosa cantiga sobre a primavera. Está en portugués pero seguro que entenderedes o texto do karaoke: Cançäo da primavera.

E seguimos con outro Karaoke para os máis maiores: Canción de primavera de Joaquín Sabina.

Para rematar déixovos un vídeoclip que non fala da primavera pero si do que estamos vivindo neste momentos. 

Son o grupo Lora, dous rapaces de Carral que coa canción Odisea chaman ao optimismo e á unidade para derrotar ao virus e aplauden a aqueles que van traballar e a todos os que nos quedamos na casa "separados para estar unidos ya habrá tiempo  para recuperar los abrazos perdidos" 

Se queres seguir xogando e traballando coa música visita os blogs 

     Caixa de xogos  e  A Arca de Marga.

Feliz primavera a todos!

Facendo música...na casa

Durante estes días que imos estar na casa sen asistir á escola podemos aproveitar para cantar, bailar e escoitar música en familia ou para xogar coa música mentres aprendemos.

No blog Caixa de xogos tedes un montón de xogos musicais para repasar o aprendido e pasalo ben.

Podedes escoller o tema do xogo facendo clic en Flipcard e despois en etiquetas.

Na marxe esquerda da páxina ZUMZUM están os enlaces aos audios e partituras traballadas este curso e cursos anteriores coa frauta.

Podedes contactar comigo a través do correo electrónico
adelacastelao20@gmail.com

Espero que nos vexamos moi pronto, ata entón bo taballo e moito ánimo!

Luthiers de 5º 2018

O alumnado de 5º nivel realizou un traballo de luthier durante o terceiro trimestre. 

No mes de abril recibimos na clase a visita dun luthier da comarca, Suso Gestal, que complementou a visita do luthier de Ordes, Manel, sobre a construción de instrumentos musicais da cultura tradicional galega.

Durante varias semanas nenos e nenas recompilaron información sobre o instrumento que querían facer ao tempo que gardaban e recollían materiais de desfeito que lles podían servir para construilo. 

 Na aula de Música cada un dos alumnos e alumnas fixeron unha exposición do seu traballo, que se valorou tendo en conta a estética, a exposición oral sobre os materiais e ferramentas empregadas e o procedemento realizado para construilo, a orixinalidade e, sobre todo, o son e a interpretación musical que realizaron co seu instrumento. 

A finalidade dun instrumento musical e facer música con el, ben interpretando unha melodía, un ritmo ou acompañando unha cantiga. Seguindo a temática proposta dende a Biblioteca do centro, "A arte galega", pedíuselle ao alumnado  que a interpretación individual ou en grupo a realizar coas súas creacións fose sobre música galega. Escoitamos pezas breves interpretadas por frautas e cordófonos e tamén moitas cantigas tradicionais ao son das súas pandeiretas, pandeiros, tambores ou botellófonos. Temos no Castelao uns luthiers e músicos estupendos!

Dende a Aula de Música agradecemos a colaboración de moitas das familias pola súa implicación neste traballo. 

 

Letras galegas 2018: María Victoria Moreno

Con motivo da celebración do Día das Letras Galegas 2018, o CEIP Antonio Fernández López comparte na súa web un estupendo traballo que nos achega a vida e obra da autora homenaxeada, Mª Victoria Moreno, cunha cantiga en xeito de rap. Animádevos a cantar con eles.

En Estremadura,  nace esta escritora, corre que te corre, chega a Barcelona.

Gústanlle as linguas, catalán e francés, estuda ben contenta, do dereito e do revés.

Lendo o Principiño, e mais o Quixote, pasa moitas horas, gozando a tope.

Logo en Madrid, estuda Filosofía, enche a súa mochila, día tras día.

 

Con Jose Luis Llácer, casa en Madrid, e logo para Galicia, marchan vivir.

Case toda a vida vive en Pontevedra, o interese por Galiza medra e medra.

Faise profesora de Literatura, Pero ensinar galego é o que máis lle gusta.

Coñece a Xesús Alonso Montero, con el colle forza o compromiso galego.

 

 Comeza a escribir, con gran puxanza, e abre en Pontevedra a Libraría Xuntanza.

Libros prohibidos pola censura, ela difundía en prol da nosa cultura.

Gaña moitos premios e recoñecementos, con “ Mar Adiante”, “ Anagnórise” ou “O Cataventos”.

Sempre escribindo e sementando con amor o interese por Galiza con valentía e paixón.

 

Morre o seu marido e ela enferma, que mal! Continúa escribindo e faino sen parar.

Segue dando clases aos seus cachorriños, traballando con eles está no paraíso.

Sempre pensou que tódalas persoas estamos feitas pra facer cousas boas.

Así o fixo e así o transmitiu. Tal compromiso con Galiza poucas veces se viu.

Danzando coa nosa música

Hoxe recibimos a visita de Patricia e Elena Noya Ruibal, dúas veciñas de Ordes, que  ofreceron aos alumnos e alumnas de 5º nivel  un estupendo obradoiro sobre o traxe e a danza tradicional. 
 Comezamos a sesión cunha explicación moi detallada sobre as diferentes pezas que conforman os traxes tradicionais galegos, tanto de home coma de muller.  Non faltaron detalles e anécdotas sobre cando e como colocar os panos, faixas, xustillos... segundo fose o traxe de gala ou de traballo.
Dous compañeiros prestáronse para lucir as vestimentas propias da comarca de Ordes e como podedes ver o resultado foi moi xeitoso.

Patricia foinos explicando o traxe peza a peza:

           

Despois Martín e Alba actuaron como modelos e vestiron as roupas que trouxeron as profes.

 

  

              

Elena aprendeunos  uns puntos de muiñeira básicos:

                       

E rematamos a sesión bailando.

Moitas grazas  Patricia e Elena polo voso traballo. Aprendemos moito.

Un bosque musical familiar en galego

Igual que en cursos anteriores, os rapaces e rapazas de 5º elaboraron unha árbore xenealóxica musical pero esta vez incidindo na música galega.

Durantes as festas do Nadal, aproveitaron as reunións familiares para facer de reporteiros e entrevistar a pais, irmás, avós... recollendo  información sobre as cantigas populares, cantos de xogos,de botar a sortes... que lembraban da súa infancia e xuventude, así como os nomes de cantantes, grupos, bandas e instrumentistas galegos que coñecían e dos que gustaban escoitar música.

Cos datos recollidos realizaron unha representación gráfica da súa árbore xenealóxica que expuxeron na aula de música, acompañada, en moitos casos, de audicións destes intérpretes.

Fai clik na imaxe ou no título e poderás ver algunhas destas árbores que formaron o bosque musical deste curso.

Árbore xenealóxica musical